Җиңүгә 80 ел: Чүпрәле районының Борындык станциясендә Җиңү поездын ничек каршы алдылар
“Җиңү поезды” 23 апрельдә Түбән Новгородтан старт алды.
2025 елның 29 апрелендә Чүпрәле районының «Борындык» станциясенә «ҖИҢҮ ПОЕЗДЫ» — Бөек Ватан сугышында Җиңүнең 80 еллыгы уңаеннан Горький тимер юлы маршруты буенча баручы уникаль ретропоезд килде.
Составны Чүпрәле районы Башлыгы Марат Гафаров, ТР Дәүләт Советы депутаты Ринат Гайзатуллин, Горький тимер юлы башлыгы урынбасарлары Сергей Шагалов һәм Александр Черемнов, шулай ук ветераннар, махсус хәрби операциядә катнашучылар, яшь армиячеләр, «Беренчеләр хәрәкәте» активистлары һәм җирле халык каршы алды.
Вакыйга кысаларында Кече Чынлы авылыннан орденлы тимер юлчы Зыятдин Арсланов һәйкәленә чәчәкләр салу, илнең магистральләрендә хезмәт куйган Советлар Союзы Геройлары хөрмәтенә «Тимер юлчыларның Үлемсез полкы» йөреше, Хәтер аллеясына нигез салу — җиңү яулаучыларга мәңгелек рәхмәт символы буларак чыршы утырттылар, шулай ук киләчәк буыннарга юллама белән вакыт капсуласы салынды, ул 2045 елда — Җиңүнең 100 еллыгына ачылачак.
Горький тимер юлы башлыгы урынбасары Сергей Шагалов билгеләп үткәнчә,: “Сугыш елларында безнең магистральләр буенча 440 мең эшелон узды. “Җиңү поезды” - буыннар арасында күпер. Ветераннар өчен ул — аларның батырлыгы онытылмаганлыгы билгесе, ә яшьләр өчен-тарихка кагылу һәм Җиңүнең нинди бәягә яулануын аңлау мөмкинлеге”
Марат Гафаров Горький тимер юлы җитәкчелегенә «Борындык» станциясен маршрутка керткән өчен рәхмәт белдерде: “Совет халкының батырлыгы турындагы хәтерне саклау-безнең изге бурычыбыз. Бу җир 1942 елда Идел рокадасын-Сталинградны тыл белән тоташтырган 978 километрлы линияне төзегән герой — тимер юлчыларны хәтерли. Буыннар элемтәсе беркайчан да өзелмәсен!”
Бер сәгать дәвамында халык ЛВ-0165 паровозын, хәрби техника белән 6 платформаны һәм экспозиция белән 2 вагон-теплушканы үз эченә алган ретросоставны карый алды. Кунаклар өчен Түбән Новгород тынлы оркестры башкаруында концерт һәм традицион солдат боткасы белән кыр кухнясы оештырылды.
“Җиңү поезды” 23 апрельдә Түбән Новгородтан старт алды. Татарстанда ул “Яшел Үзән” һәм “Буа” станцияләрендә булды. Акция Җиңүнең 80 еллыгына һәм 2025 елда Владимир Путин тарафыннан игълан ителгән Ватанны саклаучы елына багышланган.