Чүпрәле муниципаль районы

Халык түрәләр эшчәнлегенә күз-колак булып тора

2013 елның 13 ноябре, чәршәмбе

Кешеләр үзләре яшәгән авыл-шәһәр тормышында актив катнашырга тиеш. Бу очракта гына яшәү сыйфатын яхшыртып, күп кенә проблемаларны хәл итәргә була. “Халык контроле” мәгълүмати системасы барлыкка килү белән меңләгән кеше үзен борчыган мәсьәләләрне уңай чишүгә иреште инде.

Социаль челтәргә охшаш “Халык контроле” мәгълүмати ресурсыннан файдаланучылар инде күптән югары даирә вәкилләре белән шул рәвешле элемтәдә торуның тәэсирле һәм нәтиҗәле булуын аңлады. Быелның 10 ае эчендә генә дә “Халык контроле”нә 9 меңнән артык мөрәҗәгать килгән, шуларның 57 проценты уңай хәл ителгән.

Белүебезчә, күптән түгел “Халык контроле” дәүләт мәгълүмат системасының кураторы булдырылды. Әлеге вазифаны Кеше хокуклары буенча вәкил Сария Сабурская үти. Ул системаның төп модераторы функцияләрен башкарып, халык мөрәҗәгатьләренең тиешенчә каралуын контрольдә тота.

Сәрия Сабурская сүзләренчә, халык мөрәҗәгатьләренә тиешле игътибар бирмәүчеләр шактый. Тиз арада хәл итеп булган мәсьәләләрне дә озакка сузучылар күп икән. Заявкаларны карау вакыты 10 көн дип билгеләнгән булса да, бүген 48 процент мөрәҗәгатьләргә вакытында җавап бирелмәгән. Заявкаларны кире кагу очраклары да кайвакыт хаклы түгел, дип белдерде Сәрия Сабурская. Узган атнада гына да 200 шундый гозер яңадан эшкә кайтарылган.

“Халык контроле” системасында һәркем хакимият органнары эшчәнлегенә үз бәясен дә бирә ала. Күп кеше Хезмәт, халыкны эш белән тәэмин итү һәм социаль яклау министрлыгы, Транспорт һәм юл хуҗалыгы министрлыгы, Мәгълүматлаштыру министрлыгы эшчәнлеге белән канәгать түгел.

БАРЛЫК ЯҢАЛЫКЛАРНЫ УКУ