Чүпрәледә Сәйфхан Нәфиев истәлегенә көрәш буенча турнир узды
Турнир “Алтын” универсаль спорт комплексында узды.
Исегезгә төшерәбез, Чүпрәле районында Сәйфхан Нәфиев истәлегенә көрәш турнирын уздыру күркәм традициягә әйләнде.
Турнир спортчыларын һәм җанатарларын Башкарма комитет җитәкчесе Рөстәм Мөхәммәтҗанов, Чүпрәле районы прокуроры Олег Гайнетдинов һәм Көрәш буенча федерация филиалы җитәкчесе Айрат Усманов сәламләргә килделәр.
Алар билгеләп үткәнчә, бу ярышлар инде күптәннән традициягә керде, Чүпрәле районы көрәшчеләре түземсезлек белән көтә торган бәйрәм булды.
- Сезгә кызыклы ярышлар, кискен көрәш, гадел җиңү һәм, әлбәттә, һәр катнашучыга уңышлар телибез! - дип мөрәҗәгать иттеләр спортчыларга Рөстәм Мөхәммәтҗанов һәм Олег Гайнетдинов.
Быел турнир 18 яшькә кадәрге яшүсмерләр арасында, 11 үлчәү категориясендә узды. Ярышларда спорт мәктәбе, балалар иҗат йорты тәрбияләнүчеләре, мәктәп укучылары һәм тармак технологияләре техникумы студентлары катнашты.
Турнирда җиңүчеләрне хөрмәтләү өчен район башлыгы Марат Гафаров, Татарстан Республикасы прокуроры урынбасары, юстициянең өлкән киңәшчесе Илнур Ибраһимов, Сәйфхан Нәфиевның улы Гомәр Нәфиев, РФ Тикшерү комитетының РБ буенча тикшерү идарәсе җитәкчесе урынбасары Ильяс Масаллимов килде.
Турнирда җиңүчеләргә медальләр һәм кыйммәтле бүләкләр тапшырылды.
Көн дәвамында яшь көрәшчеләрне спорт ветераны, бокс буенча спорт мастеры Татар Бизнәсе авылында туып-үскән Рәфагать Салихов күзәтте.
Ул көрәшчеләргә махсус бүләкләр булдырды:
Турнирның иң яшь катнашучысы - Рәхимов Азат;
Иң яхшы техникалы көрәшче - Садеев Булат;
Иң матур алым - Гайнетдинов Рамазан.