Чүпрәле тармак технологияләре техникумы коллективы ДХР һәм ЛХР халкы өчен ярдәм җыйды
Чүпрәле тармак технологияләре техникумы #Безбергә республика акциясенә кушылды һәм Донецк һәм Луганск халык республикалары гражданнары өчен гуманитар ярдәм җыйды
Белем бирү учреждениесе директоры Фәнил Яфизов сүзләренә караганда, коллектив, беренче чиратта, кирәкле продуктлар: ярма, шикәр комы, көнбагыш мае, шәхси гигиена чаралары, балалар һәм өлкәннәр өчен кием-салым һ.б. барлыгы-300 меңнән артык сумлык ярдәм җыйган. Җыелган барлык әйбер тартмаларга һәм пакетларга сортировкалап тутырыла һәм иртәгә үк Казанга юл тотачак.
"Ярдәм итү мөмкинлегебез булганда, нигә итмәскә",- диләр техникум студентлары.
Әлеге хәйрия акциясендә 268 студент һәм 50 кешедән торган укытучылар составы кушылган.
Тәрбия эшләре буенча директор урынбасары Валерий Лухманов: "Бу укучылар белән патриотик юнәлештәге тәрбия чарасы да. Андагы хәлләрне укучыларга сөйләгәч, студентлар шунда ук ярдәм итәргә теләк белдерделәр, барысын да үзләре оештырдылар», - диде.
Исегезгә төшерәбез, Татарстанда ДХР һәм ЛХР гражданнары өчен #Безбергә гуманитар ярдәм үзәге ачылды.
Чүпрәле районында ДХР һәм ЛХР халкы өчен гуманитар ярдәм җыю дәвам итә. Акциягә оешма - предприятиеләр хезмәткәрләре, гади халык, эшмәкәрләр актив кушыла.