Чүпрәледә «Көзге каникуллар» операциясе башлана
Уку елы яңа гына башланган кебек иде. Инде менә беренче чирек тә тәмамланып килә. Укучылар тиздән каникулга чыгачак. Шушы уңайдан республика юлларында 29 октябрьдән 6 ноябрьгә кадәр «Көзге каникуллар» операциясе башланып китә.
Быелның 9 ае эчендә балалар катнашында 474 юл һәлакәте теркәлгән. Иң кызганычы – аларда 10 бала үлгән һәм 491 бала төрле дәрәҗә тән җәрәхәте алган. Пассажир-балаларның һәлак булуы аеруча борчу тудыра. Быелның узган чорында шундый авариядә биш баланың гомере өзелде. Операция кысаларында ЮХИДИ бүлеге хезмәткәрләре, участок вәкилләре мәгариф бүлеге белән берлектә мәктәпләрдә әти - әниләр һәм укучылар катнашында төрле профилактик чаралар уздырачак. Аларның төп максаты – балалар травматизмын киметү һәм киемдә яктылык кайтаргыч элементлар булуга игътибарны арттыру. Шулай ук, ди юлларда балаларның махсус утыргычта йөрүләре, куркынычсызлык каешларын бәйләп йөрүне тикшерү максатыннан рейдлар да узачак,- ди ЮХИДИ бүлекчәсе начальнигы, полиция майоры Анатолий Михайлов.