Чүпрәле мәктәпләрендә соңгы кыңгырау чыңлады

24 май көнне районыбызның 144 чыгарылыш сыйныф укучысы өчен соңгы тапкыр мәктәп кыңгыравы шалтырады.

   Иңнәрендә очар канат тойган укучылар мәктәп, иптәшләре, укытучылар коллективы белән хушлашты.  Район үзәгендәге 1 номерлы Иске Чүпрәле урта мәктәбе һәм күппрофильле лицейда узучы бәйрәм тантаналарында  район Башкарма комитеты җитәкчесе Марат Гафаров та катнашты.

-Барлык теләкләрегезнең тормышка ашуын телим: югары уку йортларына укырга керергә, эшкә урнашырга, тормышыгыз сез теләгәнчә булсын, әти-әниләр һәм укытучылар сезнең белән горурлана алсын,- диде район җитәкчесе чыгарылышлыларга мөрәҗәгать итеп.

 Укучыларны, беренче мөгаллимнәре һәм әти-әниләре, башлангыч сыйныф укучылары да  тәбрикләде. Чыгыш ясаган һәркем уку елы тәмамлану уңаеннан иң ихлас котлау сүзләрен җиткерде.

Ә тантаналарның соңгы аккорды булып, әлбәттә, соңгы кыңгырау чыңы һәм саубуллашу вальсы булды.