Чүпрәледә 2014 ел нәтиҗәләре: мәгариф

 

2015 елның 1 январена булган мәгълүматлар буенча, мәктәпкәчә белем бирү учреждениеләрендә 716 бала тәрбияләнә һәм белем ала. Бу барлык балаларның 62 проценты. Мәктәпкәчә яшьтәге белем бирү учреждениеләрендә “Туганнан алып мәктәпкә кадәр” (5 мәктәпкәчә белем бирү учреждениесендә, 120 бала җәлеп ителгән), “Балачак” (2 мәктәпкәчә белем бирү учреждениесендә, 30 бала), “Салават күпере” (1 мәктәпкәчә белем бирү учреждениесендә, 25 бала) программалары буенча эшлиләр. Шулай ук, 19  мәктәпкәчә белем бирү учреждениесендә 526 бала Васильева программасы буенча шөгыльләнә.

Бүгенге көндә районның гомуми белем бирү системасында 806 кеше хезмәт куя. Шуларның 527сен педагогик хезмәткәрләр тәшкил итә. Бу– райондагы барлык гомуми белем бирү учреждениеләрендә хезмәт итүче хезмәткәрләрнең–65,4 проценты. 527 педагогик хезмәткәрнең 414е укытучылар. Укытучыларның 346сы (83,6 процент) югары белемле.

648 педагогик хезмәткәрнең 508е квалификацион категориягә ия, бу барлык хезмәткәрләрнең 77,8 процентын тәшкил итә. Педагогик хезмәткәрләрнең 81,6 проценты I һәм югары квалификацион категориягә ия булып тора. Гомуми белем бирү учреждениеләрендә эшләүче укытучыларның 9,1 проценты (48 укытучы) пенсия яшендәгеләр. Район мәктәпләрендә 30 яшькә кадәрге 27 педагог эшли (2013-14 уку елында 24 иде).

Республика, шул исәптән, безнең район педагогларына ярдәм итүдә “Киләчәк”–“Будущее” 2010-2015 елларга мәгариф үсеше стратегиясе кысаларында “Безнең яңа укытучы”,  “Безнең иң яхшы укытучы”, “Укытучы-тикшеренүче” грантлары гамәлгә куелды. 2014 елда 15 укытучы  –“Безнең иң яхшы укытучыбыз” (2013 елда-7), 4 укытучы “Безнең яңа укытучыбыз” (2013 елда-3) грантларын яуладылар.

Мәгариф системасындагы тагын бер мөһим юнәлеш–ул талантлы, укуга һәвәс балаларны барлау. Район, республика күләмендәге төрле төрдәге олимпиадалар, конкурслар нәкъ менә шул максатны күдә тота да инде. Үткән уку елында мәктәп һәм муниципаль этапларда 26 уку предметы буенча олимпиадалар үткән. 4-11 сыйныфларда укучы 1353 бала шундый олимпиадаларның муниципаль этабында катнашкан. Муниципаль этапта 1 һәм 2 номерлы Иске Чүпрәле, Иске Шәйморза, Матак, Алешкин-Саплык, Чуваш Чүпрәлесе урта мәктәпләре укучылары югары әзерлекле булуларын күрсәттеләр. 1 номерлы Иске Чүпрәле урта мәктәбе укучылары Нияз Җәлалов 3 предмет (физкультура, инглиз теле, технология), Камилла Рәкыйпова 2 предмет (рус һәм татар әдәбият), Регина Мөхетдинова (инглиз һәм рус теле), Чуваш Чүпрәлесе урта мәктәбе укучысы Ксения Лукиянова (рус теле, әдәбият), Матак урта мәктәбе укучысы Екатерина Мердеева (чуваш һәм рус теле) буенча катнашып, призлы урыннарны яуладылар.

2013-14 уку елында “Мәгариф” милли өстенлекле проект кысаларында “Иң яхшы укытучыны бүләкләү” юнәлешендә 1 номерлы Иске Чүпрәле урта мәктәбенең татар теле һәм әдәбияты укытучысы Энҗе Җәлалова 200 мең сум күләмендә грант алды.

2014 елда 1 номерлы Иске Чүпрәле балалар бакчасы “Иң яхшы билингваль балалар бакчасы–2014” республика конкурсында катнашып, 1 млн. сумлык грант яулады. Зур Аксу балалар бакчасы тәрбиячесе Н.Симкина шул ук конкурста  катнашып, “Татар теле буенча иң яхшы тәрбияче“ дигән исемне алды.

“Мәктәпне яңа 2014-15 уку елына иң яхшы әзерләүче” республика конкурсында Кече Чынлы урта мәктәбе 2нче урынны яулап, 750 мең сумлык грант алды.

Иҗади эшләүче педагогларны ачыклау, аларга ярдәм итү һәм бүләкләү максатында районда һәр ел саен “Ел укытучысы”, “Ел сыйныф җитәкчесе”, “Ел тәрбиячесе”, “Ел педагог-китапханәчесе” һөнәри конкурслары үткәрелә. 2014 елда 1 номерлы Иске Чүпрәле урта мәктәбенең башлангыч сыйныф укытучысы Миләүшә Сабитова (“Ел укытучысы”), Л.Вәлиахметова (“Ел тәрбиячесе”), Р.Маллямова (“Ел китапханәчесе”) призерлар булдылар һәм республика конкурсының зональ этабында катнаштылар.

Татарстанда “Киләчәк”- “Будущее” мәгариф үсеше стратегиясен тормышка ашыру, балаларның техник иҗатларын үстерү һәм ярдәм итү, талантлы укучыларны, укучыларның иҗади эшчәнлекләрен актив оештыручы педагогларны ачыклау максатында 1 номерлы Иске Чүпрәле урта мәктәбе базасында 2014 елның 26 мартында “Иҗатның тылсымлы дөньясы” муниципаль фестиваль үткәрелде.

Балаларның техник иҗатын үстерү һәм ярдәм итү ТР муниципаль берәмлекләр беренче республика фестиваленә  белем бирү оешмалары технология кабинетларындагы җиһазлар ярдәмендә, 3D принтерында эшләнгән әйберләрен, шулай ук, “Уйлап табучылык һәм конструкторлык”, “Робототехника”, “Судомоделирование”, “Авиамоделирование” юнәлешләре буенча күргәзмәләргә экспонатлар тәкъдим иттеләр, картинг буенча күрсәтмә чыгышларда катнаштылар.

2014 елда 2 номерлы Иске Чүпрәле урта мәктәбе “Дәресләрдән соң мәктәп” проекты кысаларында “Робототехника” проекты үсеше өчен 610 мең 623 сумлык грант алды. Шулай ук, әлеге мәктәп “Мөстәкыйль балалар” республика проекты кысаларында республикада наркотикларга каршы профилактика проекты конкурсында катнашып, Диплом белән бүләкләнде һәм 20000 сумлык бүләккә лаек булды.

Үткән елда районның 214 укучысы бердәм дәүләт имтиханнары тапшырды. Бу барлык чыгарылыш сыйныф укучыларының 99,1 процентын тәшкил итә. 2 укучы еллык аттестацияне дәүләт чыгарылыш имтиханы рәвешендә тапшырды.

20 укучы 2 мәҗбүри предмет, 51 укучы 3 предмет, 103 укучы 4 предмет буенча бердәм дәүләт имтиханы тапшырдылар.

Районда рус теле буенча БДИ нәтиҗәсе күрсәткече уртача 59,5 балл булды.  Бу республикадагы  уртача күрсәткечтән  6,3 баллга түбән.

Математика буенча балларның түбән булуы да җитди борчу тудыра. Районда математика буенча уртача балл 39,1не тәшкил итә. Республикадагы уртача күрсәткеч исә– 48,6 балл. Соңгы 2 елдагы БДИ нәтиҗәләрен чагыштырганда, бездә ул республикадагы уртача күрсәткечтән дә түбән.

Мәҗбүри предметлардан тыш, район укучылары өстәмә рәвештә 9 предмет буенча БДИ тапшырды. Нәтиҗәләр күрсәткәнчә, баллар үткән еллар белән чагыштырганда түбән: тарих фәненнән уртача 43,1 балл (үткән ел 65,7), информатикадан  44,4 балл (үткән ел 79,8), җәмгыять белеменнән 48,6 балл (59,7), биологиядән 49,3 балл (62,8), химиядән 46,1 балл (64,4), физикадан 39,1 балл (51,7).

Укучыларның  дәресләрдән тыш буш вакытларын файдалы итү максатында мәктәпләрдә төрле түгәрәкләр, секцияләр эшләп килә.  Районның гомуми белем бирү учреждениеләрендә 2013-14 уку елында 193 түгәрәктә 2725 укучы шөгыльләнде (82,3 процент). 304 бала  ДЮСШта спортның футбол, хоккей, чаңгы, милли һәм ирекле көрәш төрләре буенча секцияләрдә шөгыльләнгән. Шулай ук районның 10 белем бирү учреждениесендә: Алешкин-Саплык, Городище, Яңа Элмәле, 1 һәм 2 номерлы Иске Чүпрәле, Хорновар-Шигали, Чуваш Чүпрәлесе, Яңа Уби, Татар Бизнәсе, Иске Элмәле мәктәпләре базасында ДЮСШның филиаллары эшләп килә.

Мәктәпләрне төзекләндерү дәвам итә. Үткән ел Балалар иҗат йорты бинасы, Татарстан Республикасы Президенты Рөстәм Миңнеханов теләктәшлеге, әлеге проектын яклавы нигезендә, төзелә башлады, һәм ул дәвам иттерелә. Боларның барысына да, үз чиратыбызда, конкурентлыкка сәләтле, Чүпрәлене таныта алырлык имтиханнарда югары уңышлары белән сөендергән укучылар тәрбияләп җавап бирә алсак иде.