Чүпрәле муниципаль районы

Татарстанда 2015 ел программасы буенча күп фатирлы торак йортларга капиталь төзекләндерү эшләре башланды

2015 елның 12 гыйнвары, дүшәмбе

2015 ел программалары формалашу турында ТР Хөкүмәте йортында узган республика киңәшмәсендә ТР төзелеш, архитектура һәм ТКХ министрының беренче урынбасары Фәрит Хәнифов хәбәр итте. Киңәшмәне видеоконференцэлемтә режимында барлык муниципаль районнар белән ТР Премьер-министры Илдар Халиков уздырды.

Фәрит Хәнифов хәбәр иткәнчә, 2015 елда республикада “Күп фатирлы йортларны капиталь ремонтлау”, “Мәгариф (мәктәпләр) объектларын капиталь ремонтлау”, “Балалар сәламәтләндерү лагерьларын капиталь ремонтлау”, “Социаль билгеләнештәге объектларда җылылык белән тәэмин итүне (пар казаннары) ремонтлау”, “Авылларда урамнарны яктыртуны яңадан торгызу”, “Ветеринария хезмәте өчен биналар төзү һәм авыл хуҗалыгы идарәсе биналарын капиталь ремонтлау” һ.б. программалар гамәлгә ашырылачак.

Бүгенгә республикакүләм өч программа килешү уза: болар - “Парклар һәм скверлар”, “Су белән тәэмин итү”, “Яшүсмерләр клубларын капиталь ремонтлау”. Илдар Халиков киләсе атнада барлык кирәкле килешү процедураларын уздыруны һәм бу программаларны гамәлгә кертүне башларга кушты.

Күп фатирлы йортларны капиталь төзекләндерү программасы буенча 2015 елда 999 йорт ремонтланачак. Программаны финанслауның күләме 4,7 млрд. сум тәшкил итә.

2015 елда 126 мәктәпне ремонтлау планлаштырылган, шул исәптән 7 коррекцияләү мәктәбе, шулай ук 10 мәктәпкәчә оешма. Программаны финанслауга 2,33 млрд. сум тотылачак.

Балаларны сәламәтләндерү лагерьларын төзекләндерүгә килгәндә, 2015 елда 12 лагерьны ремонтлау, яңа 3 лагерь төзү планлаштырылган. Программаны финанслау күләме - 104,85 млн. сум.

Авылларда урамнарны яктыртуны яңадан торгызу программасы кысаларында 2015 елда 11702 яктырткыч урнаштыру планлаштырылган. Программада 45 муниципаль берәмлек катнаша. Финанслау күләме 225 млн. сум тәшкил итә.

БАРЛЫК ЯҢАЛЫКЛАРНЫ УКУ