Татарстан Президенты төзелеш кыйммәтләнү проблемасын шәрехләде

Төзелеш материаллары һәм җиһазлары кыйммәтләнүгә карамастан, Татарстанда дәүләт программалары кысаларындагы төзелеш күләмен саклап калу зарур, товар җибәрүчеләрнең төзелеш материалларына бәяне нигезсез арттыруына юл куймас өчен, бөтен алымнардан файдаланырга кирәк. Бүген бу хакта Татарстан Президенты Рөстәм Миңнеханов ТР Төзелеш, архитектура һәм ТКХ министрлыгы коллегиясе нәтиҗәләре буенча журналистларның сорауларына җавап биргән вакытта белдерде.

ТР төзелеш, архитектура һәм ТКХ министры Ирек Фәйзуллин коллегиядә чыгыш ясап, төзелешнең кыйммәтләнү проблемасына кагылды. Аның сүзләренчә, аерым алганда, соңгы вакытта төзелеш арматурасы бәясе 25 процентка кыйммәтләнгән. "Дәүләт программалары кыйммәт була алмый, шуңа да без эшләгән проектларны яңадан анализларга, 2015 елда төзелергә тиешле объектлар, мәктәп, балалар бакчалары бәясенә сыешу өчен, үзгәрешләрне карарга кирәк. Бер үк сыйфаттагы чит илдән кертелгән җиһазны Россиядә җитештерелгәненә алыштырып була икән, моны, һичшиксез, эшләргә кирәк", - диде министр.

Үз чиратында, Татарстан Президенты вәзгыятьне шәрехләп: "Бүгенге көндә чит илләрдән товар кертүгә бәйле нинди дә булса факторлар бардыр, әмма, асылда, ил эчендә берни дә үзгәрмәде. Минемчә, бу уңайдан Монополиягә каршы федераль хезмәт тә, федераль Хөкүмәт тә һәм без дә туры элемтәләр буенча товар җибәрүчеләргә зур заказлар алу алар өчен әһәмиятле булуны аңлатырга тиешбез. Хәзер дәүләт ихтыяҗы өчен кирәкле күләмнәрне берләштереп, товар җибәрүчеләрнең үзләренә турыдан-туры чыгабыз. Бүген илдәге әлеге вәзгыятьтән файдалану матур күренеш түгел. Металлурглар бәяләрне 25-30 процентка күтәргән. Металлургларда нәрсә үзгәрде соң? Газга бәяме? Юк. Транспорт һәм логистик чыгымнармы? Юк. Хезмәт хакымы? Юк. Шуңа да без федераль Хөкүмәт һәм Монополиягә каршы федераль хезмәт бу мәсьәләне анык күзәтеп торырга тиеш дип саныйбыз", - дип белдерде.   

http://tat.tatar-inform.ru