Чүпрәле муниципаль районы

Ягулык сыйфатын тагын тикшерәләр...

2014 елның 28 ноябре, җомга

Күптән түгел Татарстанда «заправка»ларда кулланыла торган ягулыкның сыйфатын тикшерү буенча махсус айлык башланып китте. Аның максаты – начар ягулык белән сату итүче нокталарны ачыклау. Киләчәктә республикада сыйфатсыз ягулык гомумән дә калмаска тиеш, дип белдерә җитәкчеләр.

Әлеге айлык быел инде икенче мәртәбә үткәрелә. Хәтерләсәгез, беренче тапкыр ул агымдагы елның май башында игълан ителгән иде. Анда барлыгы алты бригада катнашты. Алар станцияләргә барып, ягулык үрнәкләре алды һәм аларны экспертизага тапшырды. Нәтиҗәдә, республика территориясендә урнашкан 37 “заправка”да ягулыкның сыйфатсыз булуы ачыкланды.

Сыйфатсыз ягулык нинди була?

Ә начар ягулык нинди була соң? Кагыйдә буларак, бензинда күкерт күп була, ә дизельне исә температурасына карап тикшерәләр. Әгәр дә машинага начар ягулык салынса, ул двигательгә зыян китерә, машина әкрен бара, ә кайбер очракларда, гомумән дә, хәрәкәт итмәскә мөмкин.

10 ноябрь көнне сыйфатсыз ягулык белән сату итү урыннарын ачыклау максатыннан әлеге айлык тагын бер тапкыр игълан ителде. Ул Татарстанның Министрлар Кабинеты карары нигезендә үткәрелә. Республиканың ягулык-энергетика ресурсларын сыйфатлы һәм дөрес итеп куллануны тәэмин итү идарәсе китергән мәгълүматларга караганда, әлеге айлыкның асылы үзгәрми. Ә нәтиҗәләр турында исә сөйләргә бераз иртәрәк.

- 10 декабрь көнне айлык тәмамланып, республика “заправка”ларына бәя биреләчәк. Беренче нәтиҗәләр дә шунда билгеле булачак, - дип белдерделәр безгә җаваплы идарәчелектә.

АЗС турында махсус кушымта аша укып бел

Тагын бер мәгълүмат – республика авозаправкаларындагы ягулык сыйфатын тикшерү белән дәүләт структуралары гына түгел, ә Россия автохуҗалар федерациясенең Татарстандагы бүлеге дә шөгыльләнә башлаган. Алар бу эшне октябрь аенда ук башлап җибәргән булган. Әлеге иҗтимагый оешма җитәкчесе Рамил Хәйруллин сүзләренә караганда, декабрь ае азагына Татарстан территориясендәге заправкаларның бары тик өчтән берен генә тикшереп бетерү күздә тотыла.

- Без заправкаларны махсус экспресс-тест ярдәмендә тикшерәчәбез. 92 һәм 95нче бензинга өстенлек бирәбез. Соңыннан исә әлеге тест нәтиҗәләре буенча махсус рейтинг төзеләчәк, - дип сөйләде безгә Рамил Хәйруллин.

Шунысын да билгеләп үтү кирәк, әлеге акция – федераль дәрәҗәдәге чара. Шундый ук тикшеренүләр Россиянең башка төбәкләрендә дә уздырыла.

Әйтергә кирәк, Татарстанның автохуҗалар федерациясендә Республиканың ягулык-энергетика ресурсларын сыйфатлы һәм дөрес итеп куллануны тәэмин итү идарәсе игълан иткән айлык турында белмиләр. Хәер, алар әлеге яңалыкка сөенде генә.

- Дөресен генә әйткәндә, безнең ягулык сыйфатын билгеләү критерийлары шактый аерыла. Алар күбрәк лаборатор тикшеренүләргә басым ясый. Ничек кенә булмасын, бу бик яхшы башлангыч, - дип ассызыклады Рамил Хәйруллин.

Россиянең автохуҗалар федерациясе сыйфатсыз ягулык белән сату итүче заправкаларны ачыклау максатыннан планшет һәм ноутбуклар өчен махсус кушымта да эшләгән. Әлеге системада АЗСтагы сервис дәрәҗәсе, ягулык бәясе һәм аның сыйфаты турында мәгълүмат китереләчәк. Теләге булган һәркем әлеге кушымтага кереп, теге яки бу заправка турында мәгълүмат алырга мөмкин. Хәзерге вакытта системада 6 меңнән артык заправка турында мәгълүмат тупланган инде.

http://intertat.ru

БАРЛЫК ЯҢАЛЫКЛАРНЫ УКУ