Чүпрәле муниципаль районы

Бюджет - 2015: акча бүленеп бетә

2014 елның 27 ноябре, пәнҗешәмбе

Татарстанның Дәүләт Советы утырышы дәвам итә. Депутатлар киләсе елларга исәпләнгән бюджет проекты турында озак кына фикер алышканнан соң, аны тулысынча кабул итте.

2015, 2016 һәм 2017 елларга исәпләнгән бюджет проектын икенче укылышта карар алдыннан әлеге документны Дәүләт Советы комитетларында тикшерделәр. Нәтиҗәдә, бюджет проектына 145 төзәтмә кертү тәкъдиме килеп иреште. Аларның 103е - Министрлар Кабинеты тарафыннан кертелгән.

- Бюджет проектына төзәтмәләр кертү процессында Дәүләт Советы депутатлары һәм хөкүмәт вәкилләре үзара хәбәрләшеп эшләде һәм шактый нәтиҗәле эш күрсәтте, - дип ассызыклады Дәүләт Советының бюджет, салымнар һәм финанслар комитеты рәисе Леонид Якунин.

Җитәкче сүзләренә караганда, бюджет проектындагы барлык төгәлсезлекләр бетерелеп, документның каршылыклы урыннарына ачыклык кертелгән.

- Депутатлар 2015 елга исәпләнгән бюджет акчаларының ни рәвешле бүленешен аңлады. Әлеге акчалар төрле чара, проект һәм программа кысаларында да бүленә. Мәсәлән, студентларга транспорт чараларында бушлай йөрү өчен грантлар, хезмәт хакы мәсьәләләре, башка мөһим проект һәм программалар әнә шундыйлардан, - дип дәвам итте сүзен Леонид Якунин.

Шул рәвешле, 2015 елда Татарстан бюджеты керемнәре якынча 149,3 миллиард сум дип билгеләнгән, чыгымнар күләме исә - 154,8 миллиард сум. Бюджет кытлыгы 5,5 миллиард сумга кадәр җитә.

2016 елда казна керемнәре 154 миллиард сум күләмендә көтелә, чыгымнар - 162,8 миллиард сум. Бюджет кытлыгы 8,6 миллиард сумнан артып китәр, дип уйланыла. 2017 елда керемнәр - 160 миллиард сум, чыгымнар - 174,7 миллиардка җитә. Соңгы фаразларга караганда, казна кытлыгы 14 миллиард сум (!) булачак.

http://intertat.ru

БАРЛЫК ЯҢАЛЫКЛАРНЫ УКУ