“Халык инспекторы” ярдәмгә килә

Смартфон ияләре ЮХИДИ хезмәткәрләренә ярдәм итә ала.  Киләсе атна башыннан  “Халык инспекторы” дигән яңа система эшли башлаячак. Кагыйдә бозучыларны ачыклауда гади кешеләр ярдәменә таянуның юл хәрәкәте иминлеген тәэмин итүдә уңай нәтиҗәсе булыр дип ышаналар.

“Халык инспекторы” махсус мобиль кушымтасы ярдәмендә татарстанлылар юл кагыйдәләрен санга сукмаучы машина йөртүчеләрне видеога төшереп, бу мәгълүматны турыдан-туры ЮХИДИ идарәсенә юллый ала.  Инспекторлар исә һәр шикаятьне карап, хокук бозучыны административ җаваплылыкка тарту чараларын күрәчәк.

Кушымтада төгәл вакытны һәм хокук бозу урынын теркәргә мөмкинлек биргән технология кулланыла, димәк, ялган видеолар җибәреп булмаячак. Шулай ук юл кагыйдәсен бозу очрагын ничек төшерергә кирәклеге хакында киңәшләр дә бирелгән. Чөнки билгеле бер кагыйдәләр үтәлмәгән очракта, шикаять кабул ителмәскә дә мөмкин.

Татарстан буенча Эчке эшләр министрлыгының ЮХИДИ идарәсе җитәкчесе Рифкать Миңнеханов быел республикабызда аварияләр бераз кимесә дә, юллардагы вәзгыять киеренке булып калуын билгеләп үтте. Әйтик, узган елны - 4495, быел 10 ай эчендә 4435 юл-транспорт һәлакәте теркәлгән. Хәтта штрафлар күләменең артуы да нәтиҗәләр бирмәде, дип уфтанды баш инспектор.

Яңа мобиль кушымта исә, ЮХИДИ хезмәткәрләре эшендә ярдәм була ала. Белүебезчә, Татарстанда көнкүрешнең төрле өлкәләрендәге җитешсезлекләрне ачыкларга һәм юк итәргә ярдәм итүче система - “Халык контроле” уңышлы гына эшләп килә инде. “Халык инспекторы” мобиль кушымтасы исә юл йөрү кагыйдәләрен бозуда гына махсуслашачак.

- Мондый сервис булдыру тәкъдиме яңгырагач, Россия күләмендә, чит илләрдә мондый системалар турында мәгълүмат җыя башладык. Үзебездә дә, башка илләрдә дә нәкъ шундыйларны тапмадык. Америкада һәм Германиядә аңа бераз охшашлары бар, әмма алар юл йөрү кагыйдәләрен бозуны түгел, күбрәк күршеләргә шелтә белдерү сыйфатын күздә тота, - дип сөйләде Татарстан мәгълүматлаштыру һәм элемтә министры Роман Шәйхетдинов.

Мобиль җайланма ияләренә бу махсус кушымтаны киләсе атнадан башлап интернет кибетләрдән бушлай күчереп алырга мөмкин. Әлегә ул сынау режимында гына эшли. Баштарак “гариза”лар 8 төр кагыйдә бозу буенча кабул ителәчәк. Рифкать Миңнеханов сүзләренчә, шул рәвешле автобус  юлыннан бару, рөхсәт ителмәгән җирдә сулга борылу, кызыл төскә үтү,  машинаны тротуарда калдыру, җәяүлеләр юлыннан бару, стоп-линиягә чыгу, җәяүлене үткәрмәү, “яшел” зонада туктау турында шикаять итәргә мөмкин. Алга таба мондый система ил күләмендә дә эшли башлаячак, дигән ышаныч белдерде ул.

Гүзәл НАСЫЙБУЛЛИНА

http://intertat.ru/