Чүпрәле муниципаль районы

Дәүләт порталы аша ничә сумлык түләү башкарыла?

2014 елның 5 ноябре, чәршәмбе

Бүген без электрон технологияләр, интернет дәверендә яшибез. Замана җайланмалары шулкадәр тормышыбызга үтеп керде ки, алардан башка хәзер үзебезне күз алдына да китерә алмыйбыз. Күп кенә эшне өйдән чыкмыйча башкару – гадәти күренеш.

Билгеле, барлык технологияләр кеше тормышын җиңеләйтү өчен уйлап табыла. Чыннан да, хәзер безнең мөмкинлекләребез киңәйде – берничә эшне берьюлы башкару вакытны да, көчне дә янга калдыра.

Мәгълүмати терминаллар, мобиль кушымталар, махсус порталлар да яңадан-яңа хезмәтләр тәкъдим итә. Елдан-ел электрон технологияләрнең эшенә-рәтенә төшенеп, алардан актив файдаланучылар саны да ишәя бара. Дәүләт һәм муниципаль хезмәтләр порталының популярлыгы да моның ачык дәлиле. Быелның 9 аенда гына электрон сервис аша 22 миллионга якын хезмәт башкарылган. Узган ел белән чагыштырганда бу сан 18 процентка үскән.

Барыннан да бигрәк халык дәүләт хезмәтләре порталы аша төрле түләүләрне башкаруның уңай якларына төшенә. Торак-коммуналь хезмәтләр өчен түләү, ЮХИДИ штрафларын каплау мөмкинлегеннән бүген бик күп кеше файдалана.

- Быелның 9 аенда гына да портал аша 2,4 миллиард сумлык 2 миллион түләү башкарылды. Торак-коммуналь хезмәтләр өчен түләүләр бигрәк тә күбәйде. Алар хәзер барлык түләүләрнең 35 процентын тәшкил итә. Гомумән, узган ел белән чагыштырганда быел кабул ителгән түләүләр күләме 100 процентка артты, - дип сөйләде Татарстан Элемтә һәм мәгълүматлаштыру министры Роман Шәйхетдинов.

Шулай ук халык арасында нәниләрне балалар бакчасына электрон яздырулар, аның чиратын карап бару, мәктәп укучыларының өлгерешлеген күзәтү кебек хезмәтләр популяр. Шулай ук дәүләт порталы да бер урында тормый – үсеш, үзгәреш кичерә. Әледән-әле яңа мөмкинлекләр тудырыла. Быел гына 13 яңа хезмәт барлыкка килгән. Ел тәмамланганчы тагын бер төркем яңа сервислар булачак дип вәгъдә ителде.

Роман Шәйхетдинов дәүләт хезмәтләре порталын популярлаштыруда “IT-Чемпион” бәйгесенең өлешен дә билгеләп китте. Өлкәннәрне түләүләрне интернет аша башкарырга өйрәтүгә укучыларны җәлеп итү бик яхшы нәтиҗәләр бирә. Ярыш сыйфатында оештырылган бу конкурс бик күп мәктәп балаларында кызыксыну уятты. Быелгы нәтиҗәләр буенча 3 мәктәп мобиль класс, 51 белем йорты интерактив җиһаз иясе булачак, 306 укучы ноутбуклар белән бүләкләнәчәк.

Гүзәл НАСЫЙБУЛЛИНА

http://intertat.ru/

БАРЛЫК ЯҢАЛЫКЛАРНЫ УКУ