Эчкечелек белән көрәш дәвам итә

Халыкны хәмердән биздерү өчен нинди генә чаралар кулланылмый. Соңгы елларда бу юнәлештәге башлангычлар дәүләт дәрәҗәсендә кабул ителә. Илебездә гамәлгә кертелгән бер төркем кануннар эчкечелекнең тамырына балта белән чапмаса да, билгеле бер нәтиҗәләр бирә.

Дөнья күләмендә елына җан башына уртача 8 литр алкоголь туры килә. Россиядә исә бу күрсәткеч шактый югары дәрәҗәдә кала бирә. Татарстан наркологик диспансерның баш табиб урынбасары Степан Криницкий сүзләренчә, илебез халкы, нәни сабыйларны да кертеп исәпләгәндә, җан башына елына 12-14 литр саф спирт эчә. Бу күрсәткеч дөнья стандартлары дәрәҗәсенә төшкәнче әлеге проблема бездә актуальлеген югалтмаячак.

Ил җитәкчелеге эчкечелек белән көрәшкә җитди алынды. Беренче чиратта, иң югары дәрәҗәдә кабул ителгән карарларны билгеләп үтәргә кирәк. Алкогольнең бәясен күтәрү, спиртлы эчемлекләрне төнлә сатуны тыю һәм сату урыннарын киметү – боларның барысы иртәме-соңмы үз нәтиҗәсен бирәчәк дигән ышаныч бар.

Степан Криницкий сүзләренчә, алкоголь эчемлекләрне сатып алу мөмкинлеген киметү иң нәтиҗәле ысулларның берсе булып санала. Әмма әлегә зур уңышларга ирешелде дип әйтеп булмый. Алкоголизм белән авыручылар исәбе республикабызда артмый, әмма кимеми дә.

Әйтик, аракыга бәяләр күтәрелү белән халык эчүдән туктамады, ә контрафакт эчемлекләргә генә күчте кебек. Шулай да күпчелек хәмерне легаль рәвештә кибетләрдән сатып алырга тырыша, ди Җәмәгатьчелек сәламәтлеге һәм демография проблемалары советының идарә рәисе Дарья Халтурина.

- Арзанлы алкоголь проблемасы спиртлы эчемлекләр җитештерүчеләр тарафыннан махсус кабартылып күрсәтелә. Алар шул рәвешле акцизларга бәяләр артуны булдырмаска тырышалар. Ирешелгән нәтиҗәләргә килгәндә, бу акцизлардан ил, шул исәптән республика казнасы керемнәре артты. Шулай ук спиртлы эчемлекләр куллану аркасында булган үлем-китемнәр - алкоголь белән агуланучылар, үтерешләр, үз-үзенә кул салучылар саны кимегән. Төннәрен хәмер сатылмау кешеләрнең “бәйрәм”нәрен кыскартты, ә сыраның киосклардан югалуы, яшүсмерләргә алкоголь сату проблемасын хәл итәргә ярдәм итте, - дип аңлата ул.

Гүзәл НАСЫЙБУЛЛИНА

http://intertat.ru/