Чүпрәледә Габдулла Тукайны искә алдылар
26 апрель–Габдулла Тукайның тууына 139 ел.
атар халкының бөек шагыйре шушы айда туган һәм шушы айда вафат та булган. Ел саен татар дөньясы 15 апрельне Тукайны искә алу көне буларак билгеләп үтә, 26 апрель–Габдулла Тукайның тууына 139 ел.
Бөек шагыйребез нибары бик аз-нибары 27 ел яшәгән, ләкин безгә гаҗәеп зур мәдәни мирас калдырган. “Туган телеңне онытсаң, рухыңны югалтырсың..”-дип язган ул. Габдулла Тукай туган көн–Шигырь бәйрәме һәм Туган тел көне дә.
Китапханәчеләр тырышлыгы белән әзерләнгән әлеге көнгә багышланган әдәби-мәдәни чара район мәдәният йортында узды. Чара район мәдәният каршындагы Шагыйрьләр аллеясыннан башланды. Биредә әдәбият сөючеләрне район Башкарма комитеты җитәкчесе урынбасары Айрат Җәлалов сәламләде.
–Габдулла Тукай кыска гына гомере эчендә искиткеч әсәрләр язып калдырырга өлгерә, туган иленә, теленә, табигатенә дан җырлый. Шигырьләре аша шагыйрь үзенең милләткә тугрылыгын белдерә. Ничәмә-ничә буыннар Тукай әсәрләре аша тәрбияләнгән һәм бүгенге көндә дә тәрбияләнә. Бөек шагыйрьнең әкиятләрен безнең әби-бабайлар, әти-әниләр укыган, өйрәнгән, без укыдык, һәм хәзерге буын да өйрәнә. Туган телебезне һич кенә онытырга тиеш түгелбез, буыннардан буыннарга күчеп килгән ядкарь ул,-диде Айрат Җәлалов.
Чара дәвамында Габдулла Тукайның иҗатына багышланган театраль күренешләр тәкъдим ителде, шагыйрьнең әсәрләре укылды, туган телгә багышланган җырлыра җырланды. Тамашачылар–мәктәп укучылары, мөгаллимнәр белән соңында берлектә “Туган тел” җыры башкарылды.