Чүпрәле техникумында студентлар арасында автомногоборье буенча конкурс узды
Конкурста техникумның 10 студенты көч сынашты.
2025 елның 18 апрелендә «Чүпрәле тармак технологияләре техникумында» техникум базасында «В» категорияле машина йөртүчегә белем алучы студентлар арасында автомогоборье буенча республика конкурсының муниципаль этабы узды.
Конкурс Россия Эчке эшләр министрлыгының Чүпрәле районы буенча ЮХИДИ бүлекчәсе, «Юл хәрәкәте иминлеге» ДБУнең Буа бүлекчәсе һәм «Чүпрәле тармак технологияләре техникумы» белән берлектә үткәрелде.
Конкурста 10 студент катнашты: Матвей Егунов, Илнур Кәримов, Дмитрий Ледюков, Ксения Макарова, Роман Марков, Адель Нуртдинов, Раил Садеев, Вероника Чербунова, Станислав Чернов, Дмитрий Чугунов.
Катнашучылар ике этапны уңышлы үттеләр: теоретик имтихан (юл йөрү кагыйдәләрен белүне тикшерү), практик йөртү (автомобиль йөртү күнекмәләрен күрсәтү).
Конкурс юл хәрәкәте кагыйдәләрен белүне тикшерүдән башланды. Оештыручылар билгеләп үткәнчә, барлык катнашучылар да бу сынауларны яхшы үтәгәннәр.
Аннары конкурс автодромда дәвам итте, анда катнашучылар машина йөртү осталыкларын күрсәттеләр. Биредә конкурста катнашучы һәркем автомобильне фигуралы йөртү буенча үзенең осталыгын күрсәтергә тиеш иде.
Конкурс йомгаклары буенча ярышларда җиңүчеләр ачыкланды. Ике номинация буенча яхшы нәтиҗәләр күрсәтеп, 1 урынны Раил Садеев, 2 урынны Матвей Егунов, 3 урынны Роман Марков алды.
Призлы урыннарны алган конкурсантларга «Юл хәрәкәте иминлеге» ДБУнең Казан шәһәрендәге ТИ профилактика бүлегенең әйдәп баручы белгече һәм район ЮХИДИ хезмәткәре җиңүче дипломнарын, медальләр, кубоклар һәм бүләкләр тапшырдылар. Конкурста катнашучыларның барысы да катнашучы дипломнары һәм бүләкләр белән бүләкләнде. Бүләкләр барысы да «Юл хәрәкәте иминлеге» ДБУнең Буа бүлекчәсе тарафыннан әзерләнде.
Конкурс булачак машина йөртүчеләрнең әзерлек дәрәҗәсен күтәрүгә һәм юлларда аварияләр санын киметүгә ярдәм итә, «Тормыш өчен Инфраструктура» илкүләм проектының «Юл хәрәкәте иминлеге» федераль проекты кысаларында үткәрелә.