Татарстан Республикасы Чүпрәле муниципаль районында «Зарница» хәрби-спорт уены уза
2025 елның 8 апрелендә 1 нче номерлы Иске Чүпрәле урта мәктәбендә «Зарница-2025» хәрби - спорт уенының муниципаль этабының беренче көне старт алды. «Зарница» хәрби-спорт уены ике көн рәттән булачак. Анда яшь армиячеләрнең 15 командасы катнаша. Болар-Зур Аксу, Алешкин-Саплык һәм Городище мәктәпләренең урта төркем командалары, шулай ук Матак, Түбән Чәке, Марс, Иске Чокал, Иске Шәйморза, Иске Кәкерле, Чуаш Чүпрәле, Шланга, Кече Чынлы, Уби мәктәпләренең, 1 нче номерлы Иске Чүпрәле урта мәктәбенең һәм Иске Чүпрәле күппрофильле лицееның өлкән төркем командалары.
«Зарница» хәрби-спорт уены яшьләрдә гражданлык, патриотлык, Ватанны саклауга әзерлек тәрбияләү, сәламәт яшәү рәвешен пропагандалау, хәрби-гамәли спорт төрләрен үстерү, хәрби хезмәткә чакырылуга кадәрге яшьләр белән эшләүнең яңа формаларын эзләү өлкәсендә дәүләт сәясәтен гамәлгә ашыру максатында үткәрелә.
Әлеге чарага шулай ук махсус хәрби операциядә катнашучылар Алексей Ягашкин һәм Фәнис Хәйруллин да чакырылган иде.
Спорт залына тантаналы рәвештә РФ, ТР һәм Чүпрәле муниципаль районы флагларын керткәннән соң, Россия Федерациясе һәм Татарстан Республикасы гимннары яңгырады.
Чарада катнашучыларны Яшьләр эшләре, спорт һәм туризм бүлеге начальнигы Руслан Вилданов, район мәгариф бүлеге начальнигы Газинур Хәлиуллов, Чүпрәле районында «Беренчеләр хәрәкәте» җитәкчесе Ранилә Алиуллова һәм махсус хәрби операциядә катнашучы Алексей Ягашкин җылы сәламләделәр. Алар барлык командаларга уңышлар һәм, әлбәттә инде, җиңүләр теләделәр.
Баш хөкемдар Илнур Мавзютов хәрби-спорт уеннары программасы белән таныштырганнан соң, уенның төрле дисциплиналарында ярышлар башланды. Беренче көн дәвамында командалар хәрби-спорт уеннарының төрле төрләре буенча иң яхшы нәтиҗәләр күрсәтергә тиеш иде: «Сәяси җитәкчеләр ярышы», «Башлангыч хәрби әзерлек җитәкчеләре ярышы», «Хәрбиләштерелгән эстафета», төгәллеккә граната ыргыту һ.б., гомумгаскәри грамоталылык, стройда йөрү һәм утлы коралдан ату әзерлеге.
Шунысын да билгеләп үтәргә кирәк, барлык командалар да конкурска тиешле дәрәҗәдә әзерләнергә тырыштылар, бу аларның строй белән йөри белүләрен, урында һәм хәрәкәттә борылышлар һәм үзгәртеп корулар башкаруларын күрсәтүләреннән дә күренә иде. Командаларны башкаруның көйлелеге, формасы һәм тышкы кыяфәте, җырны сайлау һәр командада да иң югары дәрәҗәдә булды.
«Зарница» хәрби-спорт уенына йомгак ясау 9 апрельдә булачак, ул көнне командалар саперлар, медиклар, штурмовиклар, тактик медицина, радиоактив, химик һәм биологик саклану, экстремаль шартларда исән калу буенча ярышларны тәмамлаячак.
«Зарница» хәрби-спорт уеннары вакытында укучылар төрле сынаулар буенча ГТО нормативларын тапшырдылар.
Исегезгә төшерәбез, ГТО комплексы «Физик культура һәм спортны үстерү» дәүләт программасы кысаларында гамәлгә ашырыла.