Чүпрәле районының ике хуҗалыгында тракторларга техник карау уздырылды
Бүгенге көндә район хуҗалыкларында язгы кыр эшләре алдыннан тракторларга, үзйөрешле машиналарга һәм аларның тагылмаларына соңгы техник тикшерү эшләре башкарыла.
Агымдагы елның март ахырында Татарстан Республикасы Дәүләт техника күзәтчелегенең Чүпрәле районы буенча бүлеге тарафыннан Татар Шатрашаны авылындагы “Чүпрәле Таң Агро” ҖЧҖнең 2 нче филиалында һәм “Айзятов А.Т.” КФХында үзйөрешле машиналарга һәм аларның тагылмаларына техник карау уздырылды. Бу хакта безгә Татарстан Республикасы Дәүләт техника күзәтчелегенең Чүпрәле муниципаль районы буенча баш дәүләт инженер-инспекторы Илдар Шәйхатдаров хәбәр итте.
— Шунысын да билгеләп үтәсе килә, Татар Шатрашаны авылындагы “Айзятов А.Т.” КФХ техник карау өчен районда беренчеләрдән булып үзйөрешле машиналар тәкъдим итте. Ике хуҗалыкта да тракторларга тиешле категориядәге механизаторлар куелган. Үзйөрешле машиналар сезонлы техник хезмәт күрсәтү узган. Янгын сүндергечләр, аптечкалар, авария билгеләре, кире чигенүгә каршы терәкләр бар, - дип билгеләп үтте Илдар Шәйхатдаров.
Дәүләт техника күзәтчелегенең баш дәүләт инженер-инспекторы билгеләп үткәнчә, ике хуҗалыкта да руль идарәсенең, тышкы яктылык приборларының, эшче һәм туктап тору тормоз системасының торышына аерым игътибар бирелгән. Анда габаритлы булмаган үзйөрешле машиналарны һәм тагылма агрегатлы тракторларны эксплуатацияләү мәсьәләләре каралды. Техник карау йомгаклары буенча анализ ясалды, инструктаж үткәрелде, тагылмалы агрегатлы тракторларны, габариттан тыш техниканы имин эксплуатацияләү кагыйдәләре каралды.