Иске Чүпрәле авылында яшәүче Фәсәхәтбану Шәйхелислам кызы Хамзинага 95 яшь
Юбилярның 6 оныгы һәм 2 оныкчыгы
Фәсәхәтбану Шәйхелислам кызын туган көне белән котларга Татарстан Республикасы Чүпрәле муниципаль районы Башкарма комитеты җитәкчесе Рөстәм Мөхәмәтҗанов һәм Иске Чүпрәле авыл җирлеге башлыгы урынбасары Рамил Низамов килде. Алар, гомер буе шушы авылда яшәгән һәм хезмәт куйган тыл ветеранына рәхмәт белдерделәр, нык сәламәтлек теләделәр, Россия Федерациясе Президенты Владимир Путин һәм район Башлыгы Марат Гафаров исеменнән котлау хатлары, истәлекле бүләк һәм чәчәкләр тапшырдылар.
Фәсәхәтбану Шәйхелислам кызы 1930 елда ТАССРның Чүпрәле районы Шланга авылында туа. Гаиләдә 11 бала, ә Фәсәхәтбану апа 8 нче бала була. Бөек Ватан сугышы башланганда аңа 11 яшь була. Ул чор өчен ул инде хезмәт кешесе булып санала иде. Шуңа күрә Фәсәхәтбану апага да иртә олылар белән колхоз кырларында эшләргә туры килә. Ул бүген дә хатын-кызларның сугыш елларында басуларда урып-җыю вакытында эшләгәннәрен хәтерли. Балалар аларга булышканнар, алар җирдә калган башакларны җыйганнар.
- Мин ул вакытта әле бала гына идем, ләкин башка яшьтәшләремнән озынрак һәм көчлерәк идем, шуңа күрә минем кулыма чалгы бирделәр һәм чабарга өйрәттеләр, вакыты шундый иде. Мин тиз печән чабарга өйрәндем. Ә эш көне азагында, хәтерлим әле, яхшы эшләгәнем өчен миңа бер стакан он биргәннәр иде, онны алдан әзерләп куйган яулыгыма салып, әйбәтләп кенә өемә алып кайтып, әниемә ризык әзерләргә бирә идем, - дип искә ала Фәсәхәтбану апа.
Әтисе, Шәйхелислам абый, урманчы булып эшләгән, ә әнисе Хәдичә апа авылда, колхозда эшләгән. Авылда җидееллык мәктәпне тәмамлаганнан соң, Фәсәхәтбану апа 8, 9, 10 сыйныфларны Иске Чүпрәле мәктәбендә тәмамлаган. Аннары Казанда сәүдә техникумы курсларын тәмамлап, район үзәгенә кайта, райпога эшкә урнаша. Башта райпода склад мөдире булып эшли, аннары сельпо кибетендә сатучы булып эшли башлый.
Бу елларда булачак ире Гаделҗан абый белән танышкан, ул Иске Чүпрәле авылыннан. Озакламый яшьләр өйләнешәләр, бер-бер артлы биш бала туа: Фәрит, Рәйдә, Рәзидә, Алсу һәм Светлана. Гаделҗан абый гомер буе туган авылында намуслы хезмәт куйган. Фәсәхәтбану апа лаеклы ялга чыкканчы һәм чыккач, тагын дүрт ел сельпо кибетендә сатучы булып эшли. Фәсәхәтбану апаның балалары әйтүенчә, әниләре аларны кечкенәдән авыл хезмәтенә өйрәткән һәм алар әниләренә тәрбиясе өчен бик рәхмәтле.
Фәсәхәтбану апа ире белән яңа йорт салалар. Бүгенге көндә ветеран шушы йортта яши. “Әти яңа йортта бер ел гына яши алды, озак вакыт кан басымы югары булудан интекте, бервакыт йөрәге түзмәде”, - дип сөйлиләр Фәсәхәтбану апаның балалары.
Төрле елларда Фәсәхәтбану апа Бөек Ватан сугышында Җиңүнең юбилей даталарына күпсанлы медальләр белән бүләкләнгән. 2025 елда илебез Бөек Ватан сугышында Җиңүнең 80 еллыгын билгеләп үтә. Бу истәлекле дата хөрмәтенә Россия Президенты Владимир Путин юбилей медален гамәлгә куйды. Күптән түгел шундый медаль Фәсәхәтбану Шәйхелислам кызына да тапшырылган иде.
Фәсәхәтбану апаның барлык балалары да гаилә корып, әниләренә оныклар бүләк иткәннәр, оныкчыклары үсеп килә. Юбилярның 6 оныгы һәм 2 оныкчыгы бар.
Бүгенге көндә, олы яшьтә булуына карамастан, юбиляр үз йортында ялгызы гына яши, балалар еш кына әниләре янына килеп, аны карыйлар.
- Мин Шланга авылында туып үстем, анда янәшәдә генә урман, саф һава, мин үз авылымны бик яратам һәм хәзер еш кына балалар белән шунда барам. Минем анда туганнарым. Мин язмыш биргән бар нәрсәдән канәгать һәм Ходайның шундый юмарт бүләге өчен рәхмәтлемен. Минем менә дигән балаларым, оныкларым һәм оныкчыкларым бар. Мин аларның барысын да яратам, алар да мине яраталар, кадерлиләр, миңа һәрнәрсәдә ярдәм итәләр, — ди ул.
Фәсәхәтбану Шәйхелислам кызы, олы яшьтә булуына карамастан, сау-сәламәт, бар нәрсәне хәтерли, энергия белән тулы. Хезмәт сөючәнлек һәм оптимизм аңа шундый данлы юбилейга кадәр яшәргә ярдәм иткәндер дип уйлыйм. Ул бүген дә телевизор карый, махсус операция турындагы яңалыкларны тыңлый, тизрәк җирдә тынычлык урнашуын һәм безнең хәрбиләрнең әниләре, хатыннары һәм балалары янына кайтуларын тели.
Бик күп авырлыклар кичерсә дә, аналарча зур сабырлык аркасында бу яшькә кадәр яшәгәндер, дип саный юбилярның кызы.
“Әни ачуланышырга яратмый иде. Беркайчан да кемнеңдер тупаслыгына тупас җавап кайтармады, ибеттә сатучы булып эшләгәндә, өлкән яшьтәге кешеләргә ярдәм итәргә тырышты, үз вакытында сатып алу өчен кибеткә тиз генә килә алмаган өлкән яшьтәге кешеләр соравы буенча, алар өчен азык-төлек һәм икмәк, чәй, башка бик күп нәрсәләр калдыра иде. Һәм, мөгаен, шундый озын гомер – Аллаһы Тәгалә бүләгедер», – дип ассызыклый Фәсәхәтбану апаның кызы.