Татарстан Республикасы Чүпрәле муниципаль районында футбол буенча «Мәктәп футбол лигасы» ярышлары узды
2025 елның 18 мартында «Алтын» спорт комплексы базасында 2024-2025 елгы сезонның «Мәктәп футбол лигасы» — районның гомуми белем бирү учреждениеләре командалары арасында футбол буенча ярышлар узды.
Ярышларда катнашучыларны район Башкарма комитеты җитәкчесенең социаль мәсьәләләр буенча урынбасары Айрат Җәлалов, районның яшьләр эшләре, спорт һәм туризм бүлеге начальнигы Руслан Вилданов, мәгариф бүлеге методисты Илнур Мавзютов сәламләделәр, барлык катнашучыларга нык сәламәтлек, күңел күтәренкелеге һәм, әлбәттә, матур уеннар теләделәр.
Ярышларда 2011-2012 елгы җиде яшүсмерләр командасы катнашты. Чара Бөек Ватан сугышында Җиңүнең 80 еллыгын бәйрәм итү алдыннан да уздырылды. Уеннардан соң иң көчлеләр билгеләнде.
Егетләр командалары арасында Яңа Әлмәле мәктәбе укучылары җиңүче булды. Икенче урынга 1 нче номерлы Иске Чүпрәле урта мәктәбенең яшь футболчылары чыкты. Өченче урынны Зур Аксу мәктәбе командасы яулады.
Футбол ярышлары кысаларында ГТО мобиль мәйданчыгы да эшләде. Исегезгә төшерәбез, ВФСК ГТО комплексы «Физик культура һәм спортны үстерү» дәүләт программасы кысаларында гамәлгә ашырыла.