Медальләр, бүләкләр һәм тылда хезмәт: Кече Чынлы авылында яшәүче 95 яшьлек Гөлҗиһан Шәйдуллова тарихы
Чүпрәле районыннан Гөлҗиһан Шәйдуллова юбилеен билгеләп үтте.
Татарстан Республикасы Чүпрәле районының Кече Чынлы авылында яшәүче Гөлҗиһан Шәйдуллова үзенең авыр яшьлек елларын, бәхетен һәм тынычлыгын алган сугыш елларын искә төшерә.
Бөек Ватан сугышы башланганда, Гөлҗиһанга нибары 11 яшь була. Аның әтисе, авылдагы башка күп кенә ирләр кебек үк, беренче көннәрдә үк фронтка китә. Анардан килгән һәр хат гаилә өчен чын бәйрәмгә әверелә.
“Авылда ирләр бөтенләй диярлек калмагач, колхоздагы бөтен авыр эш хатын-кызлар, картлар һәм балалар җилкәсенә төште. Без дә, балалар, булдыра алганча ярдәм итәргә тырыштык, - дип искә ала Гөлҗиһан апа. - Иртәдән кичкә кадәр кырда эшләдек”.
1942 елның җәендә гаилә әтисенең үлеме турында коточкыч хәбәр ала. Беркем дә бу югалтуга ышанырга теләмәде. Гөлҗиһан апа күптән көтелгән җиңүдән соң авылдашларының өйләренә кайта башлауларын әле дә хәтерли. Дусларының әтиләре фронттан кайтканнар, ә аның әтисе әйләнеп кайтмаган.
Сугыштан соң Гөлҗиһан апа гомер буе фермада эшли. Ире Җәүдәт белән бергә алар биш кыз тәрбияләп үстерәләр, аларга белем бирәләр һәм үз гаиләләрен төзергә булышалар. Лаеклы ялга чыкканнан соң да Гөлҗиһан Шәйдуллова тагын биш ел фермада эшләвен дәвам итә, уңышларга ирешә һәм ярышларда җиңеп чыга.
Бүген юбилярны кызы Сиринә карый. Гөлҗиһан Шәйдулловага 95 яшь тулу уңаеннан Башкарма комитет җитәкчесе урынбасары Айрат Җәлалов һәм Кече Чынлы авыл җирлеге башлыгы Гомәр Халитов аңа Россия Президенты исеменнән котлау хаты һәм Чүпрәле муниципаль районы башлыгыннан истәлекле бүләк тапшырдылар. Кунаклар сәламәтлек, бәхет һәм иминлек теләделәр.
Юбиляр олы яшьтәге буынга хөрмәт һәм ихтирам күрсәткәннәре өчен чын күңелдән сөенде.