Татарстан Республикасы Чүпрәле муниципаль районының Зур Чынлы авылында яшәүче Мансур Хисаметдинов 95 яшьлек юбилеен билгеләп үтте
Юбилярның 10 оныгы һәм 6 оныкчыгы.
2025 елның 15 мартында Зур Чынлы авылында яшәүче Мансур Гариф улы Хисаметдинов 95 яшьлек юбилеен билгеләп үтте.
Ветеранны котларга Татарстан Республикасы Чүпрәле муниципаль районы башлыгы урынбасары Алексей Ярухин һәм Зур Чынлы авыл җирлеге башлыгы Фаил Фатхуллов килде.
Алар ветеранны 95 яшьлек юбилее белән котладылар, тыл хезмәтчәненә, хезмәт ветеранына Россия Федерациясе Президенты Владимир Путин исеменнән котлау открыткасы, район башлыгы исеменнән бүләкләр, шулай ук ТАССРның 100 еллыгы истәлекле медале тапшырдылар.
Кунаклар Мансур Гариф улына бик күп изге сүзләр әйттеләр, нык сәламәтлек, якыннарының игътибарын тоеп яшәвен теләделәр, шулай ук 100 еллыгына да килергә вәгъдә иттеләр. Мансур абыйның бөтен тормышы туган авылы белән бәйле.
Күп еллар район һәм туган авылы хакына колхозда хезмәт куя. Төрле елларда аңа фермада да эшләргә туры килә, ләкин күп еллар колхозның төзелеш бригадасында эшли.
Авылдашлары һәм төзүчеләр белән бергә ул авыл клубы, мәктәп, ферма биналары, колхоз амбарлары төзүдә актив катнаша. Ул һәрвакыт үзенең хезмәт сөючәнлеге, башкаручанлыгы белән аерылып торган.
Күпсанлы Рәхмәт хатлары, Мактау грамоталары, Бөек Ватан сугышында Җиңүнең юбилей даталарына күпсанлы медальләр белән бүләкләнгән.
Хатыны Дания апа белән бергә алар 6 бала тәрбияләп үстерәләр: 4 кыз һәм 2 малай. Мансур абый белән Дания апа балаларына лаеклы белем алырга, тормышта үз урыннарын табарга булышалар. Аларның барлык балалары да гаилә корып, әти-әниләренә оныклар бүләк иткәннәр.
Кызганычка каршы, моннан 13 ел элек Дания апа бу дөньядан китә. Мансур абый бүгенге көндә ялгызы гына яши, балалары янына күченергә теләми.
Мансур абыйның авылда кызы Резеда гаиләсе белән яши. Ул һәр көнне әтисе янына килә һәм аңа һәрнәрсәдә ярдәм итә, ашарга әзерли, хуҗалык эшләрен башкара. Көненә берничә тапкыр әтисенә кунакка килә.
Бүген Мансур абыйның 10 оныгы, 6 оныкчыгы бар. Юбилей көнендә аның балалары әтиләрен һәм бабаларын туган көне белән котларга килгәннәр.