ТР Чүпрәле районында мәктәп укучылары арасында бадминтон буенча Спартакиада узды
Ярышларда районның гомуми белем бирү мәктәпләренең 17 командасы катнашты.
Бүген, 2024 елның 5 апрелендә, ТР Чүпрәле районының «Чемпион» физкультура-сәламәтләндерү комплексында, район укучылары Спартакиадасы кысаларында, бадминтон буенча ярышлар узды.
Ярышларда районның гомуми белем бирү мәктәпләренең 17 командасы катнашты. Һәр команда составында дүрт уенчы иде: ике кыз һәм ике малай. Уеннар кызлар арасында һәм малайлар арасында аерым үткәрелде һәм парлы категориядә микс (бер кыз һәм бер малай) уйналды.
Ярышлар бадминтонны популярлаштыру һәм үстерү, спорт осталыгы дәрәҗәсен күтәрү, иң көчлеләрне ачыклау һәм сәламәт яшәү рәвешен пропагандалау максатларында да узды.
Турнирда районның гомуми белем бирү мәктәпләренең иң яхшы бадминтончылары катнашты.
Районда бадминтон дистә еллар элек популяр булган, бүген исә бу спорт төренең олылар арасында да, яшүсмерләр һәм балалар арасында да үз сөючеләре бар.
Уеннар мавыктыргыч булды, һәр уенчы җиңүгә омтылды, ә җиңүгә юл тоткан спортчы-бадминтончыларга, әлбәттә, бик күп көч куярга туры килде. Ярышларда барысы да үзләрен лаеклы күрсәттеләр. Ләкин ярышта җиңүчеләр дә, җиңелүчеләр дә булырга тиеш.
Яшь спортчыларны яшьләр эшләре, туризм һәм спорт бүлеге җитәкчесе Руслан Вилданов һәм район мәгариф бүлеге җитәкчесе Газинур Хәлиуллов җылы сәламләделәр. Алар командаларны җиңүләре белән котладылар һәм алга таба да уңышлар теләделәр.
Ярыш нәтиҗәләре буенча 1 нче урынны 1 нче номерлы Иске Чүпрәле урта гомуми белем бирү мәктәбе командасы яулады, 2 нче урынны Зур Аксу урта гомуми белем бирү мәктәбе командасы, 3 нче урынны Яңа Элмәле урта гомуми белем бирү мәктәбе командасы яулады.
Призлы урыннарны яулаган барлык командаларга Кубоклар, Грамоталар, медальләр тапшырылды.
Ә ярышларның иганәчесе “Чүпрәле тармак технологияләре техникумы” директоры Фәнил Яфизов иде.
Шунысын да билгеләп үтәргә кирәк, бадминтон инде 30 елдан артык җәйге Олимпия уеннары программасына керә, бу аның дөнья спортында популярлыгын һәм әһәмиятен ассызыклый.
Ярышлар кысаларында ВФСК «Хезмәткә һәм оборонага әзер» нормативларын үтәү өчен мобиль мәйданчык оештырылды.